Sunnmørsprisen for 2008

Litteraturprisen "Sunnmørsprisen" for 2008 gjekk til forfattaren Lars Petter Sveen. Han debuterte i fjor med novellesamlinga Køyre frå Fræna, på Aschehoug forlag. 
 
Sunnmørsprisen er ein litteraturpris som kvart år vert utdelt til ei av dei beste nynorske bøkene frå året før. Nynorske bøker av forfattarar frå heile landet og bøker innan ulike sjangrar vert vurdert. Prisen vart første gong utdelt i 1953, og den er på kr. 10000,- og ein diplom.
 

Lars Petter Sveen er fødd i 1981, og som tittelen på boka kan peike mot, har han ei tilknyting til Fræna i Romsdalen. Boka er ei kort novellesamling på berre 90 sider, men det står meir der enn talet på ord skulle tilseie. Novellene spelar på eit stort register – frå det enkle, nakne og minimalistiske til det humoristiske og overdrivne, til dei fantastiske innslaga. Alle dei tolv novellene har ein ung mann anten som hovudperson eller forteljar. Forfattaren har sagt at han gjerne vil skrive politisk, han meiner det er for lite politisk litteratur. Men Sveen er redd for å hamne i det ”partipolitiske”, difor har dei fleste novellene allmenne tema. Oftast handlar dei om forhold – til kjærast/kone, til vener, til foreldre. Han gjev også plass til dei ”politisk ukorrekte”, til dei usympatiske stemmene, til dei som strevar, til dei som vert styrde av andre.  Køyre bort frå Fræna – det er det berre ein av mennene som gjer, men alle ønskjer seg nok vekk frå noko, vekk frå ulike forpliktingar, frå å måtte ta dei ”rette” vala og frå ansvaret for andre. I novellene møter vi lokalpolitikaren som juksar seg til valsiger, guten som mistenkjer at foreldra dopar han ned med sovemedisin, leiaren for mobben som set fyr på ordføraren. Sveen skriv knapt, men på same tid bileterikt, skrivestilen hans gjev lesaren rom til undring og meddikting.